5 URTE BIDEAN

Bidaideok: hemen gara ostera ere!

Kezkaturik al zeundeten ia galdurik genbiltzan?  Egia da zenbait arrazoi direla medio aurtengo uda inoizko lasaien hartzea erabaki genuela ekain aldera, baina badira aste batzuk gure lubakira berrelkartu ginena eta urrian Zamudio eta Lutxana bisitatu ditugu. Kontua da, udatik bueltan oporrak elkarri kontari gintzaizkiolarik, zart: aurtengo abenduan bost urte egiten ditugula gogoratu genuen!!

Atzera begiratuta, harro egoteko moduko ibilbidea egin dugula iruditzen zaigu, batez ere, jakinik, bestelako lanbideetan ematen dugula gure denbora gehiena eta zaila dela gure produktua eskaintzea rock-aren eta ska-ren inperioaren sasoiotan. Presa barik abiatuko ginela eman genuen berba eta halaxe egin dugu, bidean, mugarri bi ezarrita: munduan ortozik (2010) eta aukhera (2014).

Arestikoaz gainera, akordura datozkigu euskal herrietan zein atzerrian hurbildu zaizkigun zale, lagun, laguntzaile, antolatzaile eta abarrekoak; harreman ugari eta trinkoak josi baititugu ibilera horretan. Baina hausnartzen hasita, gogoa gure bikotekide, senide eta gertukoenengan ipini zaigu atoan, ez baita beti erreza izaten Kherauk eskatzen digun konpromisoa gehien maite ditugunen bizimoduarekin bateratzea.

Edozelan ere, maitasun adina motibo badugu gure bosgarren urtebetetzea ospatzeko, eta goian aipatu zaituztegun guztiok gonbidatu gura zintuzketegu gure urteurren jaira. Horretarako, talde apala izanik, unibertsoaren epizentroan, Bilboko alde zaharrean alegia, BilboRock aretoa erreserbatu dugu, eta datorren abenduaren 11n, gaueko 21:00etan emanaldi oso berezia eskainiko dugu, orain aurreratu ezin dizkizuegun hainbat sorpresekin.

Aretoa erreserbatzeak dakartzan gastuei aurre egiteko, 5 euroko sarrerak jarri ditugu salgai, eta ahalegindu gara aukera izan dezazuen on-line erosteko: 
http://entradium.com/es/entradas/kherau-bost-urte-bidean , halere, Barakaldoko Hala Dzipo musika Eskolan, Igorreko Zazpi Haizetara dendan eta BilboRock-en bertan ere eros ditzakezue.

Bestela ere, gaurtik aurrera eta kontzertua bitarte, eskatu diezazkigukezue artezean kheraukideoi eta topatuko dugu era sarrerak ailegarazteko. Baliteke gainera zenbait herrietan salgai jartzea, eta hala jakinaraziko dizuegu gure facebook-en.

Zuon hatsa sentitu nahiko genuke berriro, gutxienez beste bost urtean, mugarri eta guzti, ibiltzen jarrai dezagun: maite zaituztegu.